សន្និសីទ និងការតាំងពិពរណ៍ទន្តសាស្ត្រកម្ពុជាលើកទី២២
កាលបរិច្ឆេទ: ១៣ មីនា ២០២៤ / សុខភាព / Author : Veng Thavong
ទន្តពេទ្យកម្ពុជាជាង ៩០០ នាក់មកពីទូទាំងប្រទេសបានចូលរួមក្នុងសន្និសីទ និងការតាំងពិពរណ៍ទន្តសាស្ត្រកម្ពុជាលើកទី២២ ក្រោមប្រធានបទ «ការអភិវឌ្ឍឥតឈប់ឈរនៃវិស័យទន្តសាស្ត្រជាសកល» ចាប់ពីថ្ងៃទី៦ ដល់ថ្ងៃទី៧ មីនា នៅទីក្រុងភ្នំពេញ ក្នុងគោលបំណងចែករំលែកបទពិសោធន៍ និងដើម្បីបណ្តុះបណ្តាលបន្តពីចំណេះដឹងថ្មីៗទៅតាមការវិវឌ្ឍន៍រីកចម្រើននៃបច្ចេកវិទ្យានាពេលបច្ចុប្បន្ន។
សន្និសីទប្រចាំឆ្នាំមួយនេះត្រូវបានរៀបចំឡើងដោយសមាគមទន្តពេទ្យកម្ពុជាគាំទ្រដោយក្រសួងសុខាភិបាល និងមានការចូលរួមតាំងពិព័រណ៍ពីក្រុមហ៊ុនជាតិ និងអន្តរជាតិដែលផ្គត់ផ្គង់ឧបករណ៍ទន្តសាស្រ្ត និងថ្នាំពេទ្យនៅក្នុងប្រទេសប្រមាណជា៣៩ ក្រុមហ៊ុន ដែលមានស្តង់ពិព័រណ៍ចំនួន ៩២ ស្តង់ ដែលក្នុងនោះក៏មានស្តង់របស់សហគ្រាសផលិតឱសថ ប៉េប៉េអឹម ផងដែរ។
លោក សឿង គឹមសាន្ត ប្រធានសមាគមទន្តពេទ្យកម្ពុជាបានថ្លែងថា សន្និសីទ និងការតាំងពិព័រណ៍ទន្តសាស្ត្រប្រចាំឆ្នាំលើកទី២២ ឆ្នាំ២០២៤ មានការអញ្ជើញចូលរួមពីវាគ្មិនល្បីៗ ទាំងជាតិ និងអន្តរជាតិ, សិក្ខាកាមជាតិ និងអន្តរជាតិ ដែលក្នុងនោះមានតំណាងក្រសួងសុខាភិបាល ជាគណៈអធិបតីតំណាងការិយាល័យសុខភាព មាត់ធ្មេញ គណៈទន្តពេទ្យកម្ពុជា ថ្នាក់ដឹកនាំមហាវិទ្យាល័យទន្តសាស្ត្រទាំងអស់ ទាំងនេះសបញ្ជាក់ឲ្យឃើញពី ការគាំទ្រពីសំណាកំរាជរដ្ឋាភិបាលកម្ពុជា ក្នុងវិស័យទន្តសាស្ត្រនៃកម្ពុជា ដែលកំពុងធ្វើដំណើរអភិវឌ្ឍន៍ ទៅមុខជាលំដាប់គួរជាទីកត់សម្គាល់។
លោកវេជ្ជបណ្ឌិត ស៊ិក ប៊ុណ្ណា រដ្ឋលេខាធិការក្រសួងសុខាភិបាល បានថ្លែងថា សមាគមទន្តពេទ្យកម្ពុជា មានការសាមគ្គី សហការគ្នាល្អ និងបានអនុវត្តត្រឹមត្រូវនូវការជួយអប់រំ បណ្តុះបណ្តាលចំណេះដឹងបន្ត ឲ្យមាននិរន្តរភាពជារៀងរាល់ឆ្នាំដល់ ទន្តបណ្ឌិត ទន្តពេទ្យនៅកម្ពុជា។
លោកវេជ្ជបណ្ឌិតបានបន្ដថា សុខភាពមាត់ធ្មេញ ជាចំណែកមួយដ៏មានសារៈសំខាន់ នៃសុខភាពទូទៅរបស់មនុស្សគ្រប់រូប សុខភាពមាត់ធ្មេញល្អ បង្កើនសេដ្ឋកិច្ចគ្រួសារ និងសង្គមបានលូតលាស់ល្អប្រសើរ ហើយអាចចូលរួម ក្នុងការអភិវឌ្ឍប្រទេសជាតិ ផ្ទុយទៅវិញបើសុខភាពមាត់ធ្មេញមិនល្អ នាំឲ្យខាតបង់ពេលវេលា ប្រាក់កាស ទ្រព្យធន និងផលប្រយោជន៍ជាច្រើនទៀត។
លោកស្រី សូរ សោភា តំណាងឲ្យផ្នែកលក់ នៃសហគ្រាសផលិតឱសថប៉េប៉េអឹម ដែលមានវត្តមានពីរថ្ងៃក្នុងសន្និសីទនេះ បានបញ្ជាក់ថា សហគ្រាសប៉េប៉េអឹមបានផ្តល់ជាឃីតផលិតផល ថ្នាំខ្ពុលមាត់ សិបទីល គីណាល់អ៊ីបុយ និងផលិតផលមួយចំនួនផ្សេងទៀតចំនួន ៨០០ ថង់ ដល់សិក្ខាកាមនៅក្នុងសន្និសីទប្រចាំឆ្នាំមួយនេះ។ ជាមួយគ្នានេះដែរលោកស្រីក៏បានបញ្ជាក់ដែរថា នៅពេលសម្រាក និងចប់កម្មវិធី ស្តង់ពិព័រណ៍របស់ប៉េប៉េអឹមទទួលបានការទាក់ទាញខ្លាំងពីគ្រូពេទ្យទន្តសាស្រ្ត ហើយផលិតទឹកខ្ពុលមាត់ សិបទីលរបស់ប៉េប៉េអឹមមានការគាំទ្រច្រើនពីក្រុមគ្រូពេទ្យធ្មេញដោយសារពួកគាត់ទទួលស្គាល់ពីគុណភាព និងគុណប្រយោជន៍របស់ផលិតផលមួយនេះ៕
